Следи го Антропол преку Google Претседателот на Сојузот на синдикати на Македонија (ССМ), Слободан Трендафилов, реагираше по повод соопштението на раководството на Македонска пошта, кое штрајкот на вработените го оцени како тенденциозен, несериозен и политички мотивиран, тврдејќи дека платата за сите вработени е веќе обезбедена.
Трендафилов истакнува дека, и покрај ваквите тврдења, платата на повеќе од 1.700 вработени во Македонска пошта сè уште не е исплатена, поради што исто толку семејства останале без приходи токму во пресрет на најголемите празници.
„Наместо исплата на заработената плата, раководството лиферува лаги и обвинувања кон синдикатите. Факт е дека над 1.700 работници се оставени без плата, што е недозволиво и понижувачки“, порача Трендафилов.
Тој нагласи дека ССМ цврсто застанува зад работниците и синдикатите во нивната борба за навремена исплата на платите, потенцирајќи дека денешниот протест бил заеднички организиран од трите синдикати во Пошта.
„Дури и т.н. партиски синдикат, кој беше формиран под притисоци, закани и уцени кон работниците, заедно со останатите синдикати застана зад протестот, што се потврдува и со заедничкото известување за организирање општ протест“, истакна Трендафилов.
Од ССМ порачуваат дека ќе продолжат со синдикалната борба сè додека на вработените не им биде исплатена нивната заслужена плата, оценувајќи дека ваквиот однос на раководството претставува грубо кршење на основните работнички права.
