На седницата за опозициски пратенички прашања во Собранието, пратеничката од Левица, Јована Мојсоска, му упати директно прашање на министерот за економија, Бесар Дурмиши, барајќи одговор кога конечно ќе бидат доставени најавените измени на Законот за угостителска дејност, кои требаше да ги отстранат системските пропусти што придонесоа за трагедијата во Кочани.
Мојсоска посочи дека по трагичниот настан во кој животите ги загубија млади луѓе, како еден од клучните проблеми биле идентификувани токму недореченостите во постојната законска рамка. Таа нагласи дека сегашниот закон предвидува сопствениците самите да изјавуваат дали ги исполнуваат техничките услови за работа на дискотеките, без претходна задолжителна теренска проверка од надлежните институции.
„Апсурдно е што никој не проверува дали изјавата на сопственикот е вистинита пред да се издаде лиценцата. И по десет месеци од трагедијата, ако некој сака да добие лиценца, тоа ќе го направи по истиот закон кој беше во сила и во моментот на несреќата“, истакна Мојсоска.
Таа оцени дека зад ваквото лошо законско решение стојат профитните интереси на влијателни кругови од угостителскиот сектор, кои, како што рече, често се блиски до власта.
Пратеничката од Левица побара јасен рок од министерот Дурмиши, прашувајќи дали до 25 март 2026 година, точно една година по најавата за законски измени, пратениците ќе добијат Предлог-закон со кој ќе се спречат идни трагедии.
„Целта е во иднина да спречуваме, а не само да констатираме системски пропусти и трагедии“, порача Мојсоска.
