Вечерва (12 јануари) со почеток од 18 часот, во Галеријата при Домот на културата „Иван Мазов-Климе“ во Кавадарци ќе биде отворена изложбата „Фудбалски дресови на успешни деца во светот од Тиквешијата и пошироко“.
Изложените дресови се дел од колекцијата на Николчо Делов, посветена на спортските успеси, пријателствата и човечките приказни што произлегуваат од Тиквешијата и пошироко и го освојуваат светот.
На изложбата ќе бидат претставени 50 автентични спортски дресови од фудбал, ракомет, кошарка, одбојка и пингпонг – дресови кои ја надминуваат својата улога на спортска опрема и стануваат носител на приказна за личен и колективен успех, симбол на упорност, талент и дисциплина, успех и припадност кон заедницата од која потекнуваат.
Настанот е посветен на Андреј Лазаров, фудбалер кој трагично загина во несреќата во Кочани, кој остави длабок белег во поновата спортска историја на градот Кавадарци во три наврати играјќи за ГФК Тиквеш.
