Во пресрет на 76-годишнината од основањето на Народна Република Кина, кинескиот в.д амбасадор во Македонија неговата екселенција Шу Леи говори за историскиот напредок на земјата – од економскиот подем и искоренувањето на сиромаштијата, до модернизацијата и глобалната улога на Кина во светот. Во интервјуто се истакнуваат клучните постигнувања на Комунистичката партија на Кина, трансформацијата од „Произведено во Кина“ кон „Создадено во Кина“, како и придонесот на земјата во борбата против сиромаштијата и зачувувањето на светскиот мир.
Кина ја одбележува 76-годишнината од основањето на Народна Република Кина. Најпрво, дозволете ми да упатам честитки до кинескиот народ. Кои се најзначајните достигнувања на Кина во економскиот и општествениот развој од основањето на Народна Република Кина досега?
Шу Леи: Оваа година се одбележува 76 години од основањето на Народна Република Кина. Во изминатите 76 години, Комунистичката партија на Кина ги обедини и предводеше кинеските луѓе во постојана борба, создавајќи големи успеси во изградбата, реформите и отворањето кон светот, социјалистичката модернизација и социјализмот со кинески карактеристики за новата ера.
Кина постигна брз економски развој и долгорочна општествена стабилност. Економијата постојано ги надминуваше клучните прагови, а националната моќ значително се зголеми. БДП на Кина се зголеми од 67,91 милијарди јуани во 1952 година на 134,9 трилиони јуани во 2024 година, а оваа година се очекува да достигне околу 140 трилиони јуани.
Здравствените услуги постојано се подобруваат, а просечниот животен век достигна 79 години. Од постигнување на општество со умерен просперитет, до целта за заеднички просперитет – каде „никој не е оставен зад себе“ – Кина изгради најголеми образовни, социјални и здравствени системи во светот.
Во првата половина од оваа година, БДП на Кина порасна за 5,3% во споредба со претходната година, што покажува стабилни и позитивни економски перформанси. Развојот со висок квалитет бележи нов напредок, а обемот на високотехнолошките индустрии постојано расте. Позитивниот долгорочен тренд на кинеската економија останува непроменет.
Според странски финансиски институции како „Barings“, Кина поминува низ „економска трансформација без преседан“, преминувајќи од „Произведено во Кина“ кон „Создадено во Кина“, што ќе обезбеди нови можности за странските инвеститори.
Го спомнавте стремежот кон општество со умерен просперитет и целта за заеднички просперитет, со „никој да не биде оставен зад себе“. Може ли да ни објасните повеќе за постигнувањата на Кина во намалувањето на сиромаштијата?
Шу Леи: Како најголема земја во развој, Кина секогаш го поставува намалувањето на сиромаштијата како врвен приоритет.
Од почетокот на реформите и отворањето, приходите на сиромашното население значително пораснаа, разликата меѓу урбаните и руралните области се намали, а социјалните програми направија голем напредок.
Кина ги извлече сите 800 милиони луѓе од сиромаштија, со што предвреме ја постигна целта на Обединетите нации за одржлив развој до 2030 година. Бројот на луѓе извлечени од сиромаштија во Кина претставува над 70% од глобалниот вкупен број во истиот период – создавајќи „чудо во историјата на човештвото во борбата против сиромаштијата“.
По целосната победа над сиромаштијата во 2021 година, беше воспоставен петгодишен транзициски период, со систем за динамично следење и помош за спречување повторно западнување во сиромаштија.
Кина не само што директно придонесува за глобалните напори против сиромаштијата со сопствените достигнувања, туку активно им помага и на земјите во развој, споделувајќи искуства и поддржувајќи ги нивните напори да најдат патишта за развој прилагодени на нивните национални услови.
Се наведува дека бројот на членови на Комунистичката партија на Кина надминал 100 милиони. Како партијата управува со толку голема организација?
Шу Леи: До крајот на 2024 година, Комунистичката партија на Кина има 100,271 милион членови и 5,25 милиони основни партиски организации, што ја прави најголемата владејачка марксистичка партија во светот.
Генералниот секретар Си Џинпинг има изнесено низа значајни изјави за партиското градење. Тој нагласува дека, како најголема владејачка партија, КПК мора секогаш да остане трезвена и решителна во справувањето со предизвиците кои ги носи големината, за да може постојано да ја задржи поддршката на народот и долгорочната владејачка позиција.
Од 18-тиот Конгрес на КПК, Централниот комитет со Си Џинпинг во центарот направи значителни пробиви – со „осумточковната одлука за подобрување на партиското и владинското однесување“ и со строги мерки за управување и дисциплина.
Партиското раководство се усовршува, надзорот над користењето на власта се зајакнува, а реформите во системот на партиско градење се продлабочуваат. Со тоа, КПК добива сосема нов изглед и сила.
Кои се главните области опфатени со „Осумточковната одлука за подобрување на партиското и владинското однесување“?
Шу Леи: „Осумточковната одлука“ се однесува на правилата усвоени од Политбирото на Централниот комитет на КПК во 2012 година. Тие опфаќаат осум области:
- Подобрување на истражувањето и анализата,
- Рационализирање на состаноците и активностите,
- Намалување на документи и извештаи,
- Стандардизирање на странските посети,
- Подобрување на безбедноста,
- Подобрување на медиумското известување,
- Строго регулирање на објавувањето материјали,
- Поттикнување штедливост и посветеност.
Генералниот секретар Си Џинпинг самиот даде пример – патувајќи со мал тим, намалувајќи придружби и приеми, и одржувајќи директни средби со граѓани и кадри.
Според истражување на Националното биро за статистика на Кина од 2024 година, 94,9% од испитаниците изразиле позитивно мислење за ефектите од примената на овие регулативи.
По повеќе од една деценија континуирани напори, мерките донесоа вистински промени и конкретни придобивки за народот.
Кина неодамна одржа низа активности по повод 80-годишнината од победата во Војната на кинескиот народ против јапонската агресија и Светската антифашистичка војна. Кое е главното значење на овие настани?
Шу Леи: Кина свечено одбележа 80 години од победата во Војната на кинескиот народ против јапонската агресија и Светската антифашистичка војна.
Нашата цел е да ја помниме историјата, да одадеме почит на хероите, да ја цениме мирот и да создадеме подобра иднина.
Пред 80 години, по 14 години тешка борба и огромни жртви, кинескиот народ ја постигна првата целосна победа против странска инвазија во модерната историја. Кина направи огромен придонес во зачувувањето на човечката цивилизација и светскиот мир.
Денес, кога светот повторно се соочува со турбуленции и промени, претседателот Си Џинпинг ја предложи Иницијативата за глобално управување, нудејќи кинеско решение за создавање поправеден и поредовен меѓународен систем.
Потсетувањето на историјата подразбира зачувување на победничките резултати од Втората светска војна и почитување на повоениот меѓународен поредок.
Враќањето на Тајван во Кина е важен дел од тие резултати. Тајван е неразделен дел од кинеската територија – тоа е историски и фактички факт. Резолуцијата 2758 на Генералното собрание на ОН не смее да биде изопачувана или доведувана во прашање.
Кинеската модернизација следи пат на мирен развој. Кина секогаш ќе биде сила за мир, стабилност и напредок во светот, подготвена да соработува со сите земји за спроведување на глобалните иницијативи, одбрана на меѓународниот систем предводен од ОН и градење заедница со заедничка иднина за човештвото.
