Кандидатот за градоначалник на Општина Карпош од Левица, Антонио Димитров, истакна дека општината мора да добие холистички пристап во развојот, со фокус на одржлив транспорт и инфраструктура.
„Не може да се игнорира велосипедската инфраструктура, ниту јавниот превоз“, порача Димитров, нагласувајќи дека во програмата на Левица е предвидено формирање јавно претпријатие за транспорт. Според планот, тоа претпријатие би оперирало со минибуси кои ќе сообраќаат низ Карпош, особено по оската север-југ.
Како дел од решенијата за паркирањето, Димитров посочи дека монтажните гаражи се добра практика и веќе покажале резултати во Капиштец, на улицата Народен фронт. Дополнително, потенцира дека дел од проблемот може да се реши и со расчистување на постоечките подземни гаражи, кои моментално се користат како магацини или депонии под зградите.
