Владата на Словенија вчера официјално го прогласи израелскиот премиер Бенјамин Нетанјаху за „persona non grata“, со што му се забранува влез во земјата. Одлуката претставува најостар дипломатски потег на Љубљана кон Израел досега и испраќа силна порака за почитување на меѓународното право.
„Јавноста е свесна дека тој е гонет за сторени воени злосторства и злосторства против човештвото. Меѓу другото, Меѓународниот суд на правдата на 19 јули 2024 година утврди дека неколку израелски политики и практики го кршат меѓународното хуманитарно право и човековите права“, изјави државната секретарка во словенечкото Министерство за надворешни работи, Неве Грашиќ, преку платформата Икс.
Таа додаде дека со ваквата одлука, Словенија испраќа јасна порака дека очекува доследно почитување на одлуките на меѓународните судови и на меѓународното хуманитарно право.
Словенија и во претходниот период презеде низа мерки кон Израел. Минатата година официјално ја призна Државата Палестина, а во август оваа година воведе ембарго за трговија со оружје и забрана за увоз на стоки произведени на палестинските територии окупирани од Израел.
Со прогласувањето на Нетанјаху за „persona non grata“, Словенија дополнително ја заострува својата позиција и се вбројува меѓу ретките европски држави кои презедоа толку директен чекор против израелскиот премиер.
