Кандидатот на Левица за градоначалник на Град Скопје, Амар Мециновиќ, реагира преку видео на Социјалните мрежи на изјавата на премиерот Христјан Мицкоски, велејќи дека таа ја потврдува намерата на ДПМНЕ да спроведе масовна приватизација на јавните претпријатија преку јавно-приватни партнерства. Мециновиќ предупредува дека досегашното намерно колабирање на претпријатијата е стратегија за да им се наметне на граѓаните приватизацијата како единствено решение, додека Левица инсистира дека јавните претпријатија мора да останат во служба на народот, а не на приватниот капитал.
Премиерот и официјално ги потврди информациите на Левица. Изјавата на Мицкоски уште еднаш ја разоткри вистинската намера на ДПМНЕ доколку ја преземе власта во Град Скопје – ќе спроведе масовна приватизација на јавните претпријатија преку јавно-приватни партнерства.
Последните четири години, сведоци сме на систематско техничко и финансиско колабирање на јавните претпријатија. Ова е свесна стратегија преку која на граѓаните полесно им се продава приватизацијата како единствено решение.
Левица е категорично против моделот на Мицкоски и ДПМНЕ. Нашиот концепт е јасен: Jавните претпријатија треба да бидат народни претпријатија, управувани професионално и во интерес на граѓаните, а не на приватниот профит!
ЈП „Дрисла“ е единственото профитабилно претпријатие во градот. Јавно-приватно партнерство нема да донесе подобрување, туку ќе донесе само приватен профит на штета на граѓаните.
