Најголемиот светски вински натпревар Concours Mondial de Bruxelles – Red & White Session 2025 своето 32. издание оваа година го одржа во Кина, поточно во главниот град Јинчуан на најзначајниот вински регион Нингсија.
Поради сѐ поголемата популарност на овој престижен настан, организаторот „Vinopres“ од Белгија одлучи во текот на годината да ги подели натпреварите според винските стилови, во четири посебни сесии, додека овој натпревар кој е посветен на црвените и бели мирни вина (Red & White Session) претставува најголемата и најзначајната сесија.
Овие настани се познати и како „патувачки вински натпревари“, бидејќи секоја година се одржуваат во различен вински регион ширум светот. На тој начин се овозможува уникатно искуство за винските судии и дегустатори, а воедно се создава силна промоција за локалните производители и туристичкиот потенцијал на регионот домаќин.
Оваа година, повеќе од 7000 вина од 49 земји во светот се оценуваа на темна дегустација без никаква претходна информација за истите, за што беа задолжени 375 вински судии од 56 различни националности.
Иако во последните години македонските вина немаа позначителен успех на овој мошне реномиран и строг натпревар, годинава се случи вистински пресврт: од 30 испратени вина, дури 13 освоија награди – јасен сигнал за зголемената препознатливост и квалитет на македонските вина на светската сцена.
CMB Red & White Session 2025 | Yinchuan – Ningxia – China
Grand Gold – Brzanov Vranec Elixir 2012
Gold – Chateau Kamnik Masterpiece 2022, Brzanov Syrah Artizan 2021
Silver – Tikves D. Bela Voda Cuvee Blanc 2023, Tikves D. Barovo Temjanika 2024, Chateau Sopot Djinot Vranec 2023, Tikves D. Babuna Red Cuvee 2022, Vardarska Dolina Eden Barrique Cuvee 2022, Tikves Luda Mara Vranec 2022, Paragon Red Diamond 2022, Monteko Merlot 2023, Stobi Veritas Private Reserve 2017 и Monteko Cabernet Sauvignon 2023
