Од 25 јуни до 1 јули 2025 година, манастирскиот комплекс „Св. Јоаким Осоговски“ кај Крива Паланка повторно ќе стане центар на уметноста, инспирацијата и меѓукултурниот дијалог, преку одржувањето на 39. издание на Меѓународната ликовна колонија „Свети Јоаким Осоговски“.
Колонијата претставува едно од најзначајните ликовни случувања во Македонија, кое обединува истакнати уметници од земјава и Европа и служи како платформа за размена на идеи, искуства и креативна енергија. Оваа година, учество ќе земат реномирани уметници од Полска, Молдавија, Србија, Словенија и Македонија.
Меѓународниот карактер на настанот го потврдуваат присуството на Агнешка Казала од Полска, Теодор Бузу од Молдавија, Милош Декиќ од Србија/Словенија и Снежана Пешиќ Рангиќ од Србија. Од македонската ликовна сцена ќе се претстават Стефан Хаџи Николов, Мариела Аџигогова, Ивана Настески, Лазо Ѓорѓиевски, Дејан Иванов Маргуш и Стефан Младеновски.
Во текот на седумдневната ликовна резиденција, учесниците ќе создаваат нови дела инспирирани од природните убавини, духовната тишина и богатото културно наследство на Осоговските Планини и манастирот. Колонијата, како што нагласуваат организаторите, не само што го збогатува културниот живот на општината, туку и гради траен уметнички фонд кој сведочи за континуитетот на современото сликарство.
Кулминацијата на настанот ќе биде финалната изложба отворена за јавноста, каде посетителите ќе имаат можност да ги видат свежите дела и лично да се сретнат со авторите, запознавајќи се одблиску со нивниот процес на создавање.
Дополнително, на 28 јуни (сабота) со почеток во 20:30 часот, во уметничката галерија на ЛУ Градски музеј Крива Паланка ќе биде отворена самостојната изложба на сликарот Дејан Иванов Маргуш, насловена „Пејзаж“. Изложбата е дел од новата традиција на музејот, која започна лани, секоја година да се претставува творештвото на еден од учесниците на колонијата.
Ликовната колонија „Св. Јоаким Осоговски“ останува живо јадро на уметничкото изразување и културниот дијалог, а манастирот и неговото опкружување уште еднаш ќе се потврдат како неисцрпен извор на инспирација за уметниците и љубителите на визуелната уметност.
