Во Продажниот ликовен салон на Културно-информативниот центар, Скопје, на 19 јуни 2025 година, со почеток во 13 часот, ќе биде отворена самостојната изложба на академскиот сликар Илија Спасов – Чендо. Посетителите ќе имаат можност да видат 25 дела изработени во техниката пастел, создадени во изминатите две години.
Илија Спасов – Чендо е истакнат автор на македонската ликовна сцена, роден во Неготино и дипломиран на Факултетот за ликовни уметности во Скопје. Тој е член на Друштвото на ликовните уметници на Македонија (ДЛУМ) и добитник на престижната награда за сликарство „Лазар Личеновски“ во 2011 година.
Неговото творештво досега било претставено на самостојни изложби во Скопје, Софија, Битола, Белград, Нови Сад, Дубровник, Кавадарци и Неготино, како и на бројни групни изложби во земјата и странство. Пастелите што ќе бидат изложени во Скопје се сведоштво за неговиот суптилен сензибилитет, моќта на линијата и бојата, и истрајната посветеност на еден од најделикатните сликарски медиуми.
Изложбата ќе биде отворена до 1 јули 2025 година, и претставува значаен културен настан за љубителите на ликовната уметност во Скопје и пошироко. Влезот е слободен.
