Основниот суд во Кочани му одреди мерка притвор во траење од 30 дена на Александар Нацев, сопственик на агенцијата за обезбедување „Рубикон“, по проширување на истрагата од страна на Основното јавно обвинителство – Кочани во врска со трагичниот пожар што се случи во дискотеката „Пулс“.
Нацев е осомничен за „тешки дела против општата сигурност“, а обвинителството смета дека тој раководел со деловниот потфат и целокупното работење на агенцијата, заедно со претходно осомничениот управител и со овластеното лице на подружницата во Кочани. Според обвинителството, агенцијата „Рубикон“ немала склучено формален договор за обезбедување на дискотеката во Кочани, и покрај тоа што нејзини лица биле ангажирани на терен.
Александар Нацев, инаку универзитетски професор и поранешен директор на Дирекцијата за безбедност на класифицирани информации, веднаш по несреќата јавно се огласи преку Фејсбук, демантирајќи поврзаност со случајот и со агенцијата „Рубикон“. Сепак, обвинителството смета дека има основи за сомневање во неговата одговорност и побара ефективен притвор, кој судот го прифати.
Истрагата за трагедијата во „Пулс“, во која загинаа неколку млади лица, продолжува, а јавноста со внимание ги следи најновите развои поврзани со случајот.
