Израелски војници отворија „предупредувачки истрели“ кон група од 25 дипломати кои се наоѓале во Џенин, на окупираниот Западен Брег, предизвикувајќи бран на меѓународна осуда и повици за темелна истрага. Дипломатската делегација се состоела од претставници на 31 земја, вклучително и Велика Британија, Италија, Канада, Египет, Јордан, Кина и Русија, кои биле во официјална мисија организирана од Палестинската власт за да ја проценат хуманитарната состојба во регионот.
Во моментот на инцидентот, дипломати давале изјави пред медиумите, кога во нивна близина се слушнале истрели, принудувајќи ги присутните да се засолнат. Израелската војска соопшти дека посетата била одобрена, но делегацијата „отстапила од дозволената рута“, поради што биле испукани предупредувачки истрели за „безбедносни причини“.
Реакциите од светот беа остри. Министрите за надворешни работи на Канада, Велика Британија, Франција, Турција и други земји го повикаа израелските амбасадори на разговор, осудувајќи го инцидентот како „неприфатлив“. Германија го нарече дејствието „неиспровоцирано пукање“, а Канада и Европската унија побараа итна истрага.
„Очекуваме објаснување без одложување. Дипломати не смеат да бидат цел на насилство под никакви околности,“ изјави канадскиот премиер Марк Карни, истакнувајќи дека четворица канадски дипломати биле дел од групата.
Портпаролот на генералниот секретар на ОН, Антонио Гутереш, изрази длабока загриженост, додавајќи дека безбедноста и имунитетот на дипломатите мора да се почитуваат во секое време.
Палестинското Министерство за надворешни работи отиде чекор понатаму, обвинувајќи ја израелската армија дека „намерно таргетирала“ дипломати со боева муниција.
Израелската армија (ИДФ) соопшти дека „жали за предизвиканите непријатности“ и најави дека ќе ги контактира дипломатите со резултатите од внатрешната истрага.
Инцидентот се случува во време на засилена воена офанзива во Појасот Газа и ескалација на насилството на Западниот Брег, каде што Џенин беше цел на масовен израелски напад во јануари, кој доведе до раселување на десетици илјади Палестинци.
Меѓународната заедница сè погласно го осудува проширувањето на израелските населби на окупираната територија и бара хуманитарен пристап до Газа, каде што повеќе од 2,3 милиони луѓе се соочуваат со акутна глад. Иако Израел во понеделникот дозволи влез на дел од хуманитарната помош, локалните извори јавуваат дека дистрибуцијата е бавна и недоволна, а голем дел од пекарите и заедничките кујни сè уште не работат.
Инцидентот со дипломатите дополнително го засилува меѓународниот притисок врз израелските власти и отвора прашања за нивното почитување на меѓународното право и безбедноста на странските мисии во окупираните територии.
