Секторот за земјоделие на политичката партија Левица денеска остро реагираше на, како што велат, манипулациите со откупот на сурово млеко од домашните млекопроизводители, предупредувајќи дека сточарството и млекопроизводството се доведени во сериозен ризик.
Според партијата, голем број сточари во изминатите денови се пожалиле на намалување на цената на откуп на млеко од страна на млекарниците, како и на откуп без издавање кантарни белешки – што е спротивно на законските обврски.
„Млекарниците откупуваат млеко без да им дадат белешки на производителите за количината и цената, а потоа исплаќаат по неколку денари пониски цени од договорените. Ова е класичен криминал на грбот на млекопроизводителите“, стои во соопштението на Левица.
Од таму посочуваат дека според Законот за земјоделство и рурален развој, откупувачите се должни да издаваат белешки за секој откуп и навремено да ја објават цената по која откупуваат, без право на нејзино менување без седумдневна најава. Меѓутоа, во пракса, велат од Левица, овие обврски масовно се прекршуваат, а надлежните институции не реагираат.
„Министерството за земјоделство и земјоделскиот инспекторат молчат и ги држат очите затворени, додека пред нивниот нос се крадат македонските земјоделци“, порача Левица.
Во соопштението, партијата го обвинува актуелниот министер Цветан Трипуновски и владината коалиција ДПМНЕ-ВРЕДИ-ЗНАМ дека со своите политики намерно го уништуваат домашното млекопроизводство во корист на увозно, неквалитетно и евтино млеко.
„Левица дава целосна поддршка на млекопроизводителите и ги охрабруваме да бидат гласни и решителни во својата борба против оваа неокапиталистичка клиентелистичка власт“, велат од партијата.
Партијата повика на итно преземање мерки од надлежните институции и отворање постапки против млекарниците што ги кршат законските обврски, со цел заштита на сточарите и стабилизирање на домашното производство на млеко.
Целото соопштение во продолжение:
