Европската слободна алијанса (ЕФА) на своето Генерално собрание одржано во саботата во Нант, Шпанија, донесе резолуција за заштита на македонскиот идентитет во земјите на Европската Унија и земјите кандидати. Резолуцијата е предложена од Македонска алијанса за европска интеграција (МАЕИ) и ОМО „Илинден“-Пирин.
Во текстот, ЕФА изразува сериозна загриженост за положбата на Македонците во Бугарија и Албанија, наведувајќи дека тие се автохтоно население со свој македонски јазик, култура и традиции, кои се подложени на системска дискриминација, асимилација и негирање на нивниот идентитет.
Резолуцијата директно ја осудува бугарската политика на негирање на македонската нација, блокирањето на европскиот пат на Македонија, како и создавањето вештачко бугарско малцинство во Албанија преку масовно доделување државјанства. Истовремено, ЕФА ги осудува правните постапки насочени против МАЕИ и притисоците врз Македонците во Албанија, како и незаконското издавање на „сертификати за бугарско потекло“ од албански општини.
ЕФА бара Бугарија да ги укине сите услови за македонското пристапување во ЕУ кои се спротивни на Копенхашките критериуми и да ги признае истите малцински права за Македонците, какви што ги бара за Бугарите во Македонија. Резолуцијата повикува и на итно запирање на политичката агресија врз македонското малцинство во Албанија.
Дополнително, Европската слободна алијанса бара од институциите на ЕУ:
- Да се отвори ново прашање за малцинствата во пост-мониторинг процесот за Бугарија;
- Да се спроведе детална истрага за третманот на македонските малцинства во Бугарија, Албанија и Грција;
- Експлицитно да се спомене „етничко македонско малцинство“ во документите на ЕУ;
- Да се гарантира правото на самоопределување и употреба на македонскиот јазик;
- Да се укинат административните бариери за пристап до европски грантови кои ги маргинализираат македонските организации.
Според образложението на ЕФА, оваа иницијатива произлегува од растечките притисоци врз македонскиот идентитет во соседните држави и од неуспехот на ЕУ досега јасно и отворено да го признае и заштити македонското малцинство.
