„Ѓорѓи нека свири преку тебе“ – родителите на прерано починатиот музичар го подарија неговиот тапан на млад талент од Василево

Во време на тешка загуба, семејството на трагично починатиот музичар Ѓорѓи Ѓоргиев од Струмица, кој беше тапанар во популарната група ДНК, испрати тивка, но силна порака за љубов, надеж и продолжување на музиката – неговиот тапан беше подарен на младо и талентирано момче од Василево.

На трогателна средба, родителите на Ѓорѓи решија неговиот најдраг инструмент да му го доверат на Бојан Трајков – момче кое го чувствува ритамот уште од најрана возраст и кое со години сонувал еден ден да стане музичар. Симболично, овој тапан сега добива нов живот, нови ритми и нова надеж дека гласот на Ѓорѓи нема никогаш да стивне, туку ќе продолжи да одекнува низ ударите на младиот Бојан.

„Ѓорѓи нека свири преку тебе“, му рече мајката на Ѓорѓи, додека му го предаваше инструментот, а во очите на Бојан – благодарност, тишина исполнета со зборови и ветување дека секој удар ќе биде со љубов, со почит и со посвета.

Бојан не доби само инструмент – доби доверба, духовно наследство и мотив кој не може да се измери. Тапанот што некогаш ги водеше настапите на ДНК, сега ќе биде алатка преку која ќе се раскажува една приказна – за музиката што никогаш не умира, и за младите кои ги носат спомените на своите херои.

Ѓорѓи беше повеќе од музичар – беше симбол на младоста, енергијата и животот. Неговата загуба во трагичниот пожар во дискотеката „Пулс“ во Кочани остави болна празнина. Но преку овој благороден гест на неговото семејство, таа празнина доби смисла, а неговиот ритам продолжува да живее.

Во времиња кога е лесно да се заборави, токму ваквите дела потсетуваат дека вистинската музика не престанува – таа преминува од срце во срце, од раце во раце. И сега, преку Бојан, Ѓорѓи повторно свири.