Крмов до Мизрахи: Колешката МОРАЛА да ги знае последиците од етничко профилирање

Пратеникот Борислав Крмов со фејсбук статус се обрати до пратеничката Рашела Мизрахи, која јавно праша зошто на пратениците на Левица им смета предложениот-закон за Беса. Пратениците на Левица жестоко се спротиставија на ваквиот предлог-закон, бидејќи според нив, вметнувањето етничка графа ја сведува македонската нација на етникум и е чекор кон дејтонизација на Македонија. Претходно Крмов реагираше дека „раководството на ВМРО-ДПМНЕ, во нивниот очај за власт, не смеат да мрднат од албанските партии од кои зависи мнозинство, дури и кога истите спроведуваат фашизоидни политики кои имаат само една цел: поделба на македонската нација на одделни етникуми без државотворност, сведување на Македонија на територија и подготовка на теренот за конечна поделба.”


„Колешката Мизрахи, како припадничка на еден историски прогонуван и опресиран народ, над кого е извршен и геноцид, МОРАЛА да ги знае последиците од етничкото профилирање во личните документи, пред да прозива и да го брани неодбранливото.

Озогласениот „J“ печат (кој подоцна има еволуирано во жолтата Давидова Ѕвезда), кој Евреите го добивале во личните документи за полесно да ги идентификуваат, е дел од таквата етничка профилација, што за жал колешката сега ја брани. Во мирно време идентитетски ознаки на личните документи ја засилуваат поделбата и поларизацијата во општеството. Додека во конфликт, се едни од клучните фактори кои поттикнуваат, забрзуваат и олеснуваат воени злосторства!

Цитат од говорот на обвинителството против Жан-Пол Акајесу, еден од одговорните за геноцидот во Руанда: „Откако започна геноцидот во Руанда во 1994, поседување лична карта со етничка припадност Тутси значеше сигурна смртна пресуда. Ниеден друг фактор не помогна во зголемување на жртвите во 100-дневните масакри.“Пример на земји каде групната припадност на документи за идентификација е искористена за олеснување на геноцид или етничко чистење: Германија (1938-1945), Руанда (1990 – 1994), Етиопија (1998), Бутан (1991), Виетнам (1978 – 1979), Франција (1918-1920).”